काठमाडौँ ।  गत असोजको बाढी पहिरोबाट प्रभावित भएको आयोजनाहरूको पुनर्निर्माणका लागी  अर्थ मन्त्रालयले आवश्यक बजेटको स्रोत सुनिश्चित गरेको छ । भौतिक पूर्वाधार तथा यातायात मन्त्रालयबाट माग भएका २६ वटा आयोजना पुनर्निर्माणका लागि १८ अर्ब ८८ करोड रुपैयाँको स्रोत सहमति भएको हो । अर्थले क्षतिग्रस्त पूर्वाधारहरूको निर्माणमा स्रोत जुटाएसँगै पूर्व जाने छोटो मार्ग बिपी राजमार्ग लगायतका सडकहरू निर्माणको बाटो खुलेको छ ।

भौतिक पूर्वाधार तथा यातायात मन्त्रालयबाट ४ फागुनमा माग भई आएकोमा उपप्रधानमन्त्री एवं अर्थमन्त्री विष्णुप्रसाद पौडेलले आयोजनाहरू पुनर्निर्माणका लागि स्रोत सहमति प्रदान गर्ने निर्णय गरेका हुन् ।

२६ वटा आयोजना मध्ये १३ वटा सडक र १३ वटा पुल पुनर्निर्माणसँग सम्बन्धित आयोजना छन् । सडक पुनर्निर्माणमा बिपी राजमार्ग, मेची राजमार्ग, अरनिको राजमार्ग, कान्ति राजमार्गसहित १३ वटा आयोजना छन् ।